Mér var bent á það um daginn af dyggum lesanda að besserwissið væri orðið hálf skoðanalaust í seinni tíð. Mér til hrellingar sá ég að það er alveg rétt. Úr því verður bætt héðan af.
Til að byrja með skal lesendum boðið að spyrja besserwisserinn að hverju sem er í kómentum, hvort sem er um persónulega hagi eður skoðanir og yður mun svarað verða á eins óþveginn hátt og þurfa þykir.
Athugið að svör besserwissins eru skrifuð beint inn í upprunalegu kommentin.
———–
ps. Þar sem komið hefur í ljós að vísindavefur besserwissins nýtur fádæma vinsælda hefur verið stofnaður sérstakur færsluflokkur fyrir hann (Vísindavefur besserwissins). Ekki er loku fyrir það skotið að oftar verði boðið upp á besserwiss með þessum hætti.
Entries (RSS)
Hvað er Guð?
—–
besserwiss svarar:
Það fer eftir því hvaða guð þú átt við. Af stóra stafnum í spurningunni má ráða að hér sé átt við guð kristinna og gyðinga, í daglegu tali nefndur Yahve ellegar Jehóva. Það gerir svarið einfalt. Guð er kvenkyns. Það hefur í það minnsta verið bjargföst skoðun Eyglóar Jóhannesdóttur síðan hún fór að geta talað. Hefur hún jafnan talað um Guð í kvenkyni, sagt “hún” hvenær sem Guð ber á góma. Og þar sem hún kemur frá verulega trúlausu heimili dreg ég þá ályktun að það hljóti að vera vegna einhvers konar inspírasjónar. Af þeim sökum er rökrétt að álykta að Guð, sé Guð á annað borð til og þá aðeins sé Guð einhvers konar vera eða í líki einnar slíkrar, sé með útstandandi mjólkurkirtla. Q.e.d.
Hvar er Guð?
—–
besserwiss svarar:
Guð er í fríi. Það er augljóst af öllu sjittinu sem er í gangi á jörðinni. besserwiss hefur öruggar innherjaheimildir fyrir því að þegar konur fóru að klæðast pilsum sem náðu ekki niður fyrir ökkla og hættu að fara í sund í öllum fötunum og fóru að nota sundgalla sem sýndu bera framhandleggi og fótleggi, í kring um 1850, hafi Guð blöskrað allt þetta bera hold svo mjög að hún hafi pantað sér miða á fyrsta farrými til Kanarí og sé þar enn, marineruð í Pina Colada. Hún tekur sér langar gönguferðir í rigningunni, fílar ekki jóga og nýtur ásta um miðnætti í sandöldunum á höfðanum. Á meðan er stjórn heimsins í höndunum á erkifíflunum Gabríel og Mikael sem eru í raun bara uppdubbað fiðurfé. Enda hefur veröldin aldrei sé annan eins fjölda af stríðum, hryðjuverkum og Össuri Skarphéðinssyni eins og síðan 1890.
Hvert hverfa alltaf duddurnar mínar?
—–
besserwiss svarar:
Vegna þess að pabbi og mamma gleymdu að eitra fyrir dudduskrímslum áður en þú fæddist. Dudduskrímsli (Duddus horribilis) liggja í dvala í gólffjölunum í gömlum húsum frá Viktoríutímanum en vakna til lífsins þegar barn birtist í húsinu. Duddus horribilis er metaphýsískt skrýmsl sem nærist fyrst og fremst á gráti og sálaangist smábarna. Með tímanum hefur Duddusinn þróað með sér hæfni til að grípa snuð, lítil tuskudýr og önnur apparöt sem hafa róandi áhrif á smábörn, sem hann safnar í haug, svokallaðan safnhaug, í metaphýsísku tilverurými sínu utan rýmis/tíma samfellunnar. Handbók heimilanna mælir með því að eitrað sé fyrir Duddus horribilis með um það bil 3 mánaða fyrirvara sé von á barni í húsið. Er það gert með því að læðast inn í herbergi þar sem líklegt er að Duddus liggi í dvala, hoppa duglega á gólffjölunum og reka upp rækilegt Böö fyrirvaralaust. Duddus er hjartalítið skrýmsl sem umsvifalaust gefur upp öndina sé því brugðið.
Búast má við því að þegar barnið er komið á eldri ár fari duddur að dúkka upp á ólíklegustu stöðum. Það gerist þegar skrýmslið smækkar og hrörnar eins og púkinn á fjósbitanum eftir því sem smábarnið verður stærra og hættir að þarfnast sálarróandi hluta eins og dudda og tuskudýra. Því er við að bæta að þá er ákaflega mikilvægt að eitra rækilega fyrir Unglingaveikidrekanum, (Draco adolecentis magnus), sem annars getur étið heimilisfólk með húð og hári.
Ég fagna endurupptöku á hinni upprunalegu besserwiss-stefnu. Það gæti verið að núverandi skipstjóri hafi náð samband við dráttarbát sem mun draga skútuna af strandstað. Vonum bara að holur skútunnar sé ekki mikið skemmdur.
Hvaða stjórnmálaflokk myndir þú kjósa ef kosningar væru haldnar núna og þú þyrftir að kjósa nakinn?
—–
besserwiss svarar:
Áhugaverð spurning. Forsendurnar eru að kjósa þurfi nakinn. Þar sem ekki er gert ráð fyrir því í spurningunni að allir þurfi að kjósa naktir reikna ég með að hér sé um einangrað tilfelli að ræða. Sem gæti vissulega gert kosningadag áhugaverðan og eftirminnilegan fyrir mig og aðra í 13. kjördeild í Setbergsskóla. Samt sem áður tel ég að sú staðreynd að slátrið fengi að fylgjast með kosningum óhindrað myndi ekki breyta fyrirhuguðu atkvæði mínu. Ég myndi ætla mér að skila auðu þar sem ég tel að fulltrúar allra stjórnmálaflokka hafi hagað sér eins og smábörn undanfarinn mánuð og enginn þeirra flokka sem sitja á þingi núna myndi eiga skilið mitt nakta atkvæði, þar sem þeir bera í raun allir ábyrgð á ástandinu. Já ég sagði allir, ekki bara stjórnarflokkarnir. Ég minnist þess til dæmis ekki að Vinstri Grænir hafi sett fram frumvarp til laga um að Seðlabankastjórar skyldu skipaðir eftir hæfnislegum en ekki pólitískum forsendum, eða frumvarp um að auka regluverkið í fjármálageiranum. Ég man vel eftir því að Framsóknarflokkurinn var í ríkisstjórn í 12 ár áður en hann fór í stjórnarandstöðu (þessu virðast Framsóknarmenn sjálfir vera búnir að gleyma, SteingrímurHermannsonitis er að breiðast út í flokknum á ný). Ég minnist þess heldur ekki að Frjálslyndir hafi yfirhöfuð talað um annað en fisk og innflytjendur öll sína ár á þingi. Svo skamm og svei attan á allt þetta lið. Drullist til að hysja upp um ykkur brækurnar, það eru bremsuför í þeim öllum, misstór og misilla liktandi að vísu, en bremsuför engu að síður.
Hins vegar tel ég það jafn ljóst að myndi ég mæta nakinn á kjörstað myndu það margir falla í yfirlið af aðdáun að almenn múgæsing myndi skapast og ég því ekki geta nýtt atkvæðisrétt minn. Það og að löggan myndi sækja mig í biðröðina fyrir utan kjördeildina áður en ég kæmist inn til að kjósa.
Hvað áhrif telur þú að núverandi þjóðfélagsástand hafi í framtíðinni, á þá stéttarskiftingu sem var farin að myndast á Íslandi ?
—–
besserwiss svarar:
Ég held að það til skamms tíma muni það hafa mikil áhrif, og athugið að hér talar sagnfræðingur. Mér finnst vera tiltölulega stutt frá Móðuharðindum.
Atvinnuleysi og fjöldagjaldþrot er eitthvað sem ekki byggist upp aftur á tveimur til fimm árum. Afleiðingin er sú að mikið af uppbyggingarstarfi atvinnulífsins undanfarin tuttugu ár er farið fyrir borð, svo við notum hefðbundið þjóðarskútulíkingamál. Það leiðir óneitanlega af sér riðlun í þjóðfélaginu, fólk fær ekki vinnu við það sem það hefur menntað sig til, verðmætasköpunin verður minni og svo framvegis.
En til lengri tíma litið held ég að stéttskiptingin í þjóðfélaginu verið ekki svo ýkja mikið breytt. Við búum nú þegar við ákveðna stéttskiptingu á Íslandi. Stéttskiptingu eftir menntun. Þótt það sé mikill munur á þeim sem lægstu launin hafa og þeim sem hæstu launin hafa þá er ekki neinn stjarnfræðilegur munur á þeim lægst launuðu og þeim “normal” launuðu. Þeir sem hæstu launin hafa haft eru ekki það stór prósenta að það sé hægt að tala hér um stéttskiptingu eftir efnislegum gæðum. Hér hafa allir jafnan aðgang að menntun, heilbrigðisþjónustu og annarri grunnsamfélagsþjónustu, sem er eitt grundvallaratriðið sem líta þarf til þegar rætt er um stéttskiptingu. Eitt grunneinkenni stéttskiptra þjóðfélaga er jafnan ólíkur aðgangur stétta þjóðfélagsins að slíkum gæðum. Þannig er stéttskipting í Bandaríkjunum augljós með tilliti til heilbrigðisþjónustu og langskólamenntunnar þar í landi. Á Íslandi er þessu ekki svo háttað, og þess eru strax merki að þessi jafni aðgangur almennings verði fremur styrktur en hitt í kjölfarið á kreppunni. Háskólar bjóða aukið framboð, félagslega kerfið mun styrkjast og svo framvegis. Stéttskipting snýst ekki aðeins um krónutöluna í launaumslaginu, heldur miklu fremur um annars konar gæði og viðhorf, og það hvað krónurnar þurfa að geta keypt.
Til langs tíma held ég því að stéttskipting á Íslandi muni verða á svipuðu róli og hún hefur verið. Ég trúi ekki á Nýja Ísland, það er tálsýn. Við erum ekkert að fara að hoppa inn í samfélag byggt á launajöfnuði og umhyggju fyrir náunganum þótt bankarnir séu farnir á hausinn og forsætisráðherra vilji lækka launin sín. Verum svolítið raunsæ. Kreppur renna sitt skeið á enda, shit happens og svo heldur lífið áfram, og þegar þessi verður horfin á braut tekur kapítalisminn og frjálshyggjan aftur við sem stýriapparat í íslensku þjóðlífi. Kannski og vonandi ekki jafn hratt og með jafn miklu offorsi og vanhugsun og áður. En það er einföld staðreynd að frjálst markaðshagkerfi með sterkum félagslegum undirstöðum er það sem virkar fyrir Ísland. Það hafa síðustu tuttugu ár sýnt svart á hvítu.
Ég held (eða vona?) að við eigum eftir að passa okkur betur í framtíðinni, setja fastari reglur um fjármál og markaðsviðskipti og setja aukinn kraft í félagslega kerfið sem sannað hefur gildi sitt í þessum hremmingum (íbúðalánasjóður er gott dæmi). En það er jafn ljóst að um leið og við erum búin að vinna okkur upp úr veseninu þá munum við flykkjast sem einn maður út í búð til að verða fyrst til að kaupa okkur fótanuddtæki framtíðarinnar.
Er kúl að snusa?
—–
besserwiss svarar:
Nei. Það er ekki kúl að snusa. Hins vegar getur kúl fólk snusað, og kúlið smitast þá á snusið líka, en snusið eitt og sér er ókúl.
Hvað verður um alla stöku sokkana?
—–
besserwiss svarar:
Sokkaskrímslið (Strumpfus maximus) étur þá. Það býr aftan við þvottavélar og þurrkara (kann best við sig í heitu umhverfi) og plokkar sér einn og einn stakan sokk úr tromlunni með matprjónum. Strumpfus maximus er mikill matgæðingur, og líkar best við dökklita sokka, og barnasokka.
Verða karlmenn almennt veikari en konur?
—–
besserwiss svarar:
Nei. Karlmenn og konur verða álíka veik. Misskilningurinn liggur í því að konur umgangast að mestu leyti veika menn aðeins þegar þær eru giftar þeim. Og giftir menn hafa auga fyrir tækifærum eins og mildri flensu. Þar sem allir aðrir sjá aðeins kvef, nefrennsli, hita og beinverki, þar sjá giftir karlmenn tækifæri á morgunmat í rúmið, heitu kakói í sófann, teppi fyrir framan sjónvarpið, almennri vorkun og ástarlotum í lækningaskyni. Á meðan einhleypir karlmenn harka af sér ælupestina og drífa sig í vinnu er gifta karlmanninum eðlislægt að nýta sér möguleikann á hjúkrun og skilyrðislausu viðstjani konu sinnar, sem alla jafna býðst ekki á hverjum degi.
Gifti karlamaðurinn er hinn fullkomni tækifærissinni þegar kemur að veikindum. Hann kveinkar sér óspart, liggur í rúminu í svitakófi og virðist almennt verða gífurlega mikið veikur þegar hann krækir sér í tiltölulega saklausar umgangspestir. Af þessu leiðir að konur telja karlmenn almennt vera aumingja sem ekki þola veikindi eða sársauka og tengja þetta því að karlmenn fæði ekki börn og þess vegna sé þolið á einhvern hátt minna. Og þó sú kerlingabók fari í taugarnar á öllum karlmönnum þá hefur gifti karlmaðurinn vit á að halda kjafti þegar hana ber á góma, því að þessi skýring og misskiliningur kvenna tryggir honum indæla þjónustu næst þegar hann fær kvef.
ég vil leiðrétta þetta síðasta svar frá þér! Sokkarnir fara til sokkahimna þar sem allir stakir sokkar eru ánægðir því þeir þurfa ekki hinn sokkinn til að uppfylla tómarúmið eins og aðrir sokkar sem eru í pörum. Ekkert sokkaskrímsli sko.
Þetta er án gríns úr sænskri barnabók…
—–
besserwiss svarar:
Ég ætla að skrifa barnabók. Hún mun heita: Sokkar fara til himna. Sannið til, þetta verður metsölubók.
Er hægt mögulegt að stúta David Caruso með því að hugsa nógu stíft um það?
—–
besserwiss svarar:
Nei.Það er ekki hægt. Á sama hátt og Keith Richards verður ekki komið fyrir kattarnef með hefðbundnum vopnum verður David Caruso ekki í hel komið með hugaraflinu einu saman. Hann hefur um sig hjúp svalleika, svokallaðan cooliðshjálm. Sá eini sem getur drepið David Caruso með því að hugsa um það er Chuck Norris. Það virkar ekkert gegn Chuck Norris.
Hafa Eygló og Fjóla Ósk ekki lesið Land hinna týndu sokka???? stöku sokkarnir fara nebbla ekki til himna og strumfus maximus kemur þar hvergi nálægt.
mér finnst þetta skemmtilegt, soldið eins og okkar prívat vísindavefur! en ég geri ráð fyrir að besserwissnum þyki meira gaman að hinum spurningunum, sem koma ekki frá fjölskyldunni
—–
besserwiss svarar:
Jävla! Þaðp hefur einhver óprúttinn Svíi stolið bókinni minni. En nei, hér á heimilinu höfum við aldrei heyrt um land hinna týndu sokka. Besserwisser stendur á gati.
En það skal haft á hreinu að besserwiss hefur jafn gaman af öllum spurningum, því allar gefa þær tækifæri á að uppfræða almúgann.
Mér þykir unun að sjá hve löng svör þín eru, ergo, hve langan tíma þú tekur þér í þetta verkefni. Þess vegna langar mig að bera upp fleiri spurningar.
Við höfum tvö ræðulið. Lið A er skipað þannig. Liðsstjóri er Stefán Pálsson. Frummælandi er Inga Lind Karlsdóttir, meðmælandi er Steingrímur J. Sigfússon og stuðningsmaður er Davíð Oddsson. Lið B er skipað svo. Liðsstjóri er Jóhanna Sigurðardóttir. Frummælandi er Páll Magnússon. Meðmælandi er Sigmar Guðmundsson. Stuðningsmaður er Arnar Björnsson. Umræðuefnið er Reisum skýjaborgir, og mælir lið A með en lið B mælir á móti. Besserwissinn er eini dómarinn.
Hvernig myndi rökræða liðanna byggjast upp? Hvernig væru einstakir ræðumenn? Hvort liðið myndi vinna keppnina? Og hver væri ræðumaður kvöldsins?
Mér finnst þetta rosalega áhugavert og held að þetta sé ný nálgun á Morfís-kláminu. Svona Morfís-fan fiction. Er að elska þetta nú þegar.
—–
besserwiss svarar:
Ésús! Ertu að reyna að fá mig til að sóa samfelldri viku í þetta svar?! Herra fundarstjóri, besserwiss gerir hlé á máli sínu til að hugsa og skrifa verðugt svar. Það er einsýnt að það verður ekki gert á tíu mínútum! En hafið engar áhyggjur. Það var beðið um morfís fanfiction og morfís fanfiction skulið þið fá. Þetta svar mun birtast sem sérstök færsla á besserwissinu innan viku. Undirskrifað og stimplað, besserwiss.com.
Veit besserwisserinn betur en aðrir wisserar?
—–
besserwiss svarar:
Það er innbyggt í orðsins hljóðan. Allir aðrir wisserar eru wesserwisserar.
Nú verð ég hreinlega að nálgast bókina Land hinna týndu sokka…
en að annarri spurningu; Af hverju er það fyrsta sem litlir drengir gera eftir að þeir læra að stýra handahreyfingum að toga í tippið á sér?
—–
besserwiss svarar:
Af nákvæmlega sömu ástæðu og hundar sleikja sitt: Af því þeir geta það.
Þetta blogg er alveg hreint frábært hjá þér, miklu betra heldur en bjartsýnishjal eða krepputal. Núna er ég búin að ná upp hlátursköstunum fyrir október og nóvember mánuð, takk kærlega
Ég þakka sömuleiðis
Hversu miklar líkur eru á að Diljá verði sett í sóttkví í Hrísey þegar hún kemur aftur heim? Ef engar, er okkur samt óhætt að vera utandyra?
—–
besserwiss svarar:
Það fer eiginlega eftir því hve mikill hundur verður í henni þegar hún kemur heim. hún er náttúrulega búin að komast í snertingu við allar alkóhóltegundir sem framleiddar eru í veröldinni, innbyrða fimmfaldan ráðlagðan lífsskammt (RLS) af áströlskum bjór og enn meira af öðrum bjór, ferðast um allskonar framandi lönd með framandi pestum og veirum út um allt og sof[RITSKOÐAÐRITSKOÐAÐRITSKOÐAÐRITSKOÐAÐRITSKOÐAÐ]ngað til handfangið brotnaði af og það þurfti lækni til að ná því út aftur. Þannig að við verðum bara að vona að slatti af þessum peningum hafi farið í kaup á gúmmí…öh…bátum…já gúmmíbátum (nei, hæ Borghildur, þú hér?).
Í ljósi þessara staðreynda tel ég yfirgnæfandi líkur á því að sóttvarnareftirlit ríkisins krefjist þess að Diljá verði sett í búr í Hrísey í svona tvær vikur. Það er allt í lagi, það er heimsóknatími milli fimm og sjö á virkum dögum svo þetta er fín aðlögun fyrir okkur hin.
Loksins náði besserwisserinn sér aftur á strik! Ég var eiginlega alveg hætt að nenna að kíkja á hann, þó mér þyki annars mikið til tengdasonar nr uno koma.
Spurningin er: Hvar er Míó ?
—–
besserwiss svarar:
Hann er í regnbogalandinu. Á bak við sófann, að búa sig undir að bíta í girnilegar tær.
Bannað að spyrja um Míó!! og bannað að svara spurningum um Míó!! Og hann beit ekki í tær heldur kálfa.
Ég óska eftir óritskoðaða textanum um ævintýri litlu systur á facebook!!
Ég veit ekki hvort það er þorandi…. þetta ritskoðaði sig sjálfkrafa þegar ég skrifaði það…sjálft internetið hafði ekki maga í þetta……
Svona fyrst við vorum í þjóðfélagsfræðiprófi:D
Af hverju fær maður það á tilfinninguna að þjóðfélagsfræði sé nýtilbúið og tilgangslaust fag sem að ekki einu sinni þú, hinn mikli Jóhannes nennir að kenna okkur? :Þ
Ef tilgangurinn er í því, gætiru þá nefnt starf annað en starf þjóðfélagsfræðikennara sem að þetta myndi koma að gagni í?
—–
besserwiss svarar:
Aaahhhhh, góð spurning.Sannleikurinn er sá að Þjóðfélagsfræði er eitt gagnlegasta fagið sem kennt er í skólum landsins. Vandamálið liggur í kennslubókinni. Hún er þeim ókosti hlaðin að félagsfræðihlutinn er allur í fyrri partinum. Öll óræðu hugtökin og óáþreifanlegu krísuspurningarnar um sjálfið, umhverfið, einstaklinginn og niðursetninga á nítjándu öld hrúgast því í fyrstu tvo hlutana, sem þýðir að haustönn verður vissulega nokkuð óspennandi, nema fyrir þá sem á annað borð eru félagsfræðilega hneigðir. Það er mín reynsla að það sé minnihluti nemenda í 10. bekk, hvað þá sjálfur kennarinn.
Á hinn bóginn vænkast hagur Strypmu á haustönn, því að seinni hluti efnisins er drekkhlaðinn skemmtiefni; stjórnmálakerfið, stjórnkerfi lýðræðisríkja, þrískipting ríkisvaldsins, Evrópusambandið, Evrópska efnahagssvæðið, Nató og Sameinuðu þjóðirnar koma þar við sögu ásamt fleiri stuðboltum og úr verður kakófónía skemmtunar og galsa.
bara svona til að halda í randomið…..er tímaflakk mögulegt? og ef svo er, endilega komdu með eitt stykki leið til þess :O
og svona smá auka, afhverju finnur maður aldrei neina hluti fyrr en maður er búinn að kaupa annað af því sem maður fann ekki?
—–
besserwiss svarar:
Tímaflakk er vissulega mögulegt. Hins vegar er það háð skilgreiningu á tíma og er því allt annað en einfalt. Tvær höfuðskilgreiningar koma til greina:
A) Tími er línuleg samfella. Þ.e. tími er eins og tímalína sem atburðir raðast á í chronologískri röð, svipað og tölur á talnalínu. Aðeins þessi eina lína er til, ergo, samfelldur línulegur tími. Hér er tímaflakk tiltölulega einfalt í framkvæmd. Tímaflakkarinn ferðast fram og aftur í tíma, sem skv. skilgreiningu er hans eigin tímalína og um leið allra annarra. Atburðir sem hann breytir í fortíðinni hafa því áhrif á “nútímann” (eigintíma tímaflakkarans, sem flakkið miðast við) og “framtíðina”. Gott dæmi um tímaflakk í samfelldum línulegum tíma er bíómyndin Back to the Future. Þar er höfuðvandamál söguhetjunar að sjá til þess að foreldrar hans giftist og eignist hann sjálfan, því komi hann í veg fyrir það hverfur hann snarlega úr tímalínunni. Annað goitt dæmi er bíómyndin Timecop, sem má segja að sé grunnnámsefni um tímaflakk í samfelldum línulegum tíma.
B) Tími er ekki línuleg samfella. Til eru nokkrar framsetningar á þessu, misflóknar. Í grunnin ganga þær þó flestar út á einhvers konar útgáfu af eftirfarandi lógík:
Þar sem tími er ekki línuleg samfella verður til eins konar tímatré. Við skulum hér miða við persónuna X. Í hvert sinn sem persónan X þarf t.d. að taka mikilvæga ákvörðun, velur á milli tveggja möguleika, eru tvær leiðir færar. Þessir tveir möguleikar standa þá fyrir tvær mögulegar tímalínur. Ólínulegur tími gerir þá ráð fyrir því að þesar leiðir séu báðar raungerðar, að tíminn skiptist eins og buxnaskálmar (eins og Terri Pratchett hefur t.d. sett fram á svo skemmtilegan hátt). Persóna X fetar þá leiðina niður aðra buxnaskálm tímans en hefði sem best getað fetað sig niður hina buxnaskálmina, sem hefði sett í gang allt aðra tímalínu. Þannig má gera ráð fyrir því að báðar buxnaskálmar tímans séu í raun raunverulegar tímalínur og persóna X sé til í þeim báðum, sem persóna Xi og Xii. Á þennan hátt eru til óteljandi tímalínur, óteljandi hliðstæðir raunveruleikar sem allir skarast í einhvers konar stofni. Gott dæmi um hliðstæðan ólínulegan tíma er bíómyndin The One, þar sem söguhetjan ferðast á milli hliðstæðra raunveruleika til að drepa sjálfan sig í þeim öllum, til að verða á endanum eina eintakið af sjálfum sér. Vandamálin sem tímaflakk býður upp á í hliðstæðum ólínulegum tíma eru enn meiri en í samfelldum línulegum tíma, því ekki er einungis hægt að fokka upp framtíðinni á sinni eigin núverandi tímalínu, heldur flakka á milli tímalína og fokka upp öllu þar líka og hverfa svo á braut.
Báðar þessar skilgreiningar eiga við hringvandamálið að stríða. Ef ég ferðast frá árinu 2008 aftur til ársins 1960 og póstsendi sjálfum mér leiðbeiningar um tímaflakk sem munu berast mér árið 2008, sem ég nota þá til að ferðast aftur til ársins 1960, hvar er þá upphafspunkturinn? Það eru svona spurningar sem valda því að ég geymi teikningarnar af tímavélinni í læstri skúffu.
Og já, ástæðan fyrir því að maður finnur ekkert fyrr en maður er búinn að kaupa nýtt er að Samtök Atvinnulífsins eru með agenta sem fara aftur í tímann, fela hlutina fyrir þér þannig að þú neyðist til að kaupa nýtt eintak, koma svo aftur daginn eftir og skilja upprunalega hlutinn eftir á ógeðslega augljósum stað.
Who am I?
—–
besserwiss svarar:
You are Mr. Gisli, leader of jamat ahmadiya Iceland.
Er möguleiki að Dexter geti afgreitt Horatio Caine? HC er sekur um margt sem Dexter fyrirlítur t.d. slæmt málfar, er vondur við þá sem eiga það ekki skilið (mig) og svo er hann rauðhærður. Stutt að fara
Ég veit ekki afhverju mér datt þetta ekki strax í hug.
—–
bessewiss svarar:
Já besserwiss getur fallist á að Dexter gæti mögulega afgreitt Horatio Caine. Það þyrfti samt að gerast þegar Caine er sofandi og nær þessvegna ekki til sólgleraugnanna nógu hratt. Ef hann kemur þeim á fésið þarf Dexter að forða sér á hlaupum.
besserwiss spyr:
Er Dexter illa við rauðhærða?
Eg veit ekki hvadan thid faid thessar hugmyndir um ad eg se ad drekka herna uti. Eg er bara ad halda a thessu fyrir vini mina.
Spurning: Hversu dyrar jolagjafir tharf eg ad kaupa handa bornunum i thessari fjolskyldu til ad thau vilji muna eftir mer aftur?
—–
besserwiss svarar:
Það fer eftir því hvernig þú skilgreinir börn. Yngstu börnin gera sig ánægð með eitthvað fallegt frá útlöndum, því útlenskar gjafir eru alltaf flottastar. Hins vegar er meiri höfuðverkur hversu mjög þú þarft að sleikja upp börn móður þinnar, það gæti þurft slatta af góssi til að blíðka Örvar. Hann er farinn að stunda sjóböð til að herða upp flengivöðvana…
stóru börnin vilja bara alvöru jólagjafir!
Hvað er unglingaveiki og hvers vegna legst hún mismunandi á mismunandi fólk á mismunandi tímum?
—–
besserwiss svarar:
Langa svarið er: Af mismunandi ástæðum. Unglingaveiki er hryllilegur sjókdómur sem venjulega byrjar að herja á stúlkubörn í kring um 7 ára aldurinn (samkvæmt minni reynslu allavega). Einkennin lýsa sér í því að foreldrar verða skyndilega mjög hallærislegar mannverur, orðið “oooohhhhhhh!” er notað í ýmsu samhengi yfir hluti sem foreldrar gera og segja, rokið er inn í herbergi og hurðum skellt og sjónvarpsefni á borð við High School Musical verður skyndilega mjög vinsælt.
Strákar grípa ekki þessa bakteríu venjulega fyrr en þremur til fimm árum síðar, enda allt of uppteknir við að leika spidermann, og síðar við að þykjast finnast stelpur leiðinlegar og ljótar.
Unglingaveiki er kvilli sem getur slegið niður hvenær sem er, en grípur alla á einhverjum tímapunkti. Best er að taka hana út snemma, því þá er minni hætta á að henni fylgi leiðinlegur tónlistarsmekkur (fyrir foreldra), heimskulegur klæðnaður þörf fyrir að setja á sig göt á ólíklegustu staði og fleira í þeim dúr. Í þeim tilfellum þar sem unglingaveiki gerir ekki vart við sig á unglingsárum geta viðkomandi orðið fyrir því að grípa bakteríuna í kring um fertugs og fimmtugsaldurinn og er hún þá kölluð grái fðringurinn. Karlmenn fara þá og kaupa sér mótórhjól og haga sér almennt eins og fífl. En það gera karlmenn reyndar alltaf, svo munurinn er ekki greinanlegur hjá mörgum þeirra.
Stutta svarið er: Hormónar.
Hver er vitlausasta hugmynd í heimi?
—–
besserwiss svarar:
Vitlausustu hugmynd í heimi (eða að minnsta kosti þá vitlausustu sem ég hef heyrt um hingað til) fékk Eric Tomaszewski. Hann fékk þá hugmynd að kveikja á eldspýtu við endann á pappahólknum sem hann hafði stungið upp í endaþarminn á félaga sínum, Andrew Farnum, til að freista þess að lokka út hamsturinn þeirra. Lesið meira um ævintýri þeirra kumpána Erics og Andrews hér.
Ef ég væri ekki svona inní mér þá mundi ég hlæja upphátt til morguns.
Þar sem það vantar linkinn þinn þá setti ég annan inn. lol
http://www.darwinawards.com/legends/legends1998-10.html
Takk fyrir það…. ég hló svo mikið inni í mér að ég gleymdi að tengja tengilinn.
Afhverju borðar fólk kæsta skötu á þorláksmessu?
Hef aldrei almennilega skilið það